Монгол Улсын Ерөнхийлөгч У.Хүрэлсүх болон ХХААХҮ-ийн сайд Ж.Энхбаяр “Брэнд гутал” ХХК-ийн үйл ажиллагаатай танилцлаа

2025 оны 11 дүгээр сарын 14-ний өдөр Монгол Улсын Ерөнхийлөгч У.Хүрэлсүх, Хүнс, хөдөө аж ахуй, хөнгөн үйлдвэрийн сайд Ж.Энхбаяр нар манай үйлдвэрт зочлон ажиллаж, “Брэнд гутал” ХХК-ийн үйлдвэрлэлийн үйл явц, чанарын бодлого, бүтээгдэхүүний шинэчлэл, өргөтгөлийн чиглэлтэй танилцлаа.

“Брэнд гутал” ХХК нь экологийн цэвэр арьс ширэн түүхий эдээр, импортыг орлох өндөр чанартай бүтээгдэхүүн үйлдвэрлэн, дотоодын хэрэгцээг хангаж, цаашлаад экспортыг нэмэгдүүлэх зорилгоор үйл ажиллагаагаа өргөжүүлэн ажиллаж байна.

Зорилтот уулзалтын үеэр манай компанийн удирдлагууд Ерөнхийлөгч болон салбарын сайдтай үндэсний үйлдвэрлэлийг дэмжих бодлогын хүрээнд дараах саналуудыг албан ёсоор уламжиллаа. Үүнд:

• Томоохон худалдааны сүлжээ, франчайз дэлгүүрүүдэд “Үндэсний булан” байгуулах
• Сурагчийн дүрэмт хувцас болон сурагчийн гутлыг дотоодын үйлдвэрлэгчдээс хангах тогтолцоо бүрдүүлэх
• Импортоор орж ирж буй хөдөлмөр хамгаалал, тусгай зориулалтын гуталд өндөр татвар ногдуулах

Эдгээр санаачилга нь дотоодын үйлдвэрлэгчдийн борлуулалтыг дэмжих, хэрэглэгчдэд Монголдоо үйлдвэрлэсэн чанартай бүтээгдэхүүнийг илүү хүртээмжтэй болгох, мөн импортоос хамааралтай байдлыг бууруулах ач холбогдолтой юм.

“Брэнд гутал” ХХК нь чанар, стандарт, инновац дээр тогтсон үндэсний үйлдвэрлэгчийн хувьд Монгол Улсын үйлдвэрлэлийн хөгжил, экспортын өсөлтөд хувь нэмрээ үргэлжлүүлэн оруулах зорилго тээн ажиллаж байна.